大頭旺仔一粒珠

• 大頭旺仔伊都一粒珠，相打唔認輸。
• 夯竹篙托金龜，金龜一下飛。
• 哎喲大頭旺放風吹，風吹斷了線。
• 大頭旺仔傢伙，哎喲去一半。

打馬膠

• 打馬膠，粘著跤，叫阿爸，買豬跤，
• 豬跤箍仔，滾爛爛，飫鬼囡仔流喙涎。

天烏烏

• 天烏烏，卜落雨，阿公仔夯鋤頭仔卜掘芋。
• 掘啊掘，掘啊掘，掘著一尾辿鰡鼓，
• 咿呀嘿都真正趣味。
• 天烏烏，卜落雨，阿公仔夯鋤頭仔卜掘芋。
• 掘啊掘，掘啊掘，掘著一尾辿鰡鼓，
• 咿呀嘿都真正趣味。
• 阿公仔卜煮鹹，阿媽仔卜煮汫。
• 二個相拍弄破鼎，咿呀嘿都啷噹叱噹嗆，哇哈哈。
• 阿公仔卜煮鹹，阿媽仔卜煮汫。
• 二個相拍弄破鼎，咿呀嘿都啷噹叱噹嗆，哇哈哈。
• 弄破鼎，弄破鼎，弄破鼎，咿呀嘿都啷噹叱噹嗆，
• 哇哈哈，哇哈哈，哇哈哈，哇哈哈。

正月正

• 正月正，聽見跋繳聲。
• 二月二，老土地。
• 三月三，桃仔李仔雙頭擔。
• 四月四，桃仔來，李仔去。
• 五月五，西瓜排甲滿街路。
• 六月六，頭家落田拍碌碡。
• 七月七，龍眼烏，石榴必。
• 八月八，牽豆藤，挽豆莢。
• 九月九，風吹滿天吼。
• 十月十，人收冬，頭家倩長工。
• 十一月，年兜邊，家家戶戶人搓圓。
• 十二月，換新衫，來過年
• 　

人插花．伊插草

• 人插花，人插 花，伊插草。
• 人抱嬰，人抱嬰，伊抱狗。
• 人未嫁，人未嫁，伊先走。
• 人坐轎，人坐轎，伊坐畚斗。
• 人睏紅眠床，伊睏屎礐口。
• 人睏紅眠床，伊睏屎礐口。

十二生相

• 一鼠，賊仔名，二牛，駛犁兄，
• 三虎，爬山崎，四兔，遊東京，
• 五龍，皇帝命，六蛇，互人驚，
• 七馬，跑兵營，八羊，食草嶺，
• 九猴，爬樹頭，十雞，啼三聲，
• 十一狗，吠契兄，十二豬，菜刀命。

大箍呆

• 大箍呆哎喲白目眉，無人請你就家己來。
• 來來大箍呆炒韭菜，燒燒一碗來，冷冷阮無愛。
• 大箍呆炒韭菜，燒燒一碗來，冷冷阮無愛。
• 大箍呆，到今你才知，到今你才知。

火金姑

• 火金姑來食茶，茶燒燒，食根蕉。
• 根蕉冷冷，食龍眼。
• 龍眼愛撥殼，換來食藍菝仔，藍菝仔全全籽，
• 害阮食一下落喙齒，害阮食一下落喙齒。

白鷺鷥

• 白鷺鷥車糞箕，車到溪仔墘
• 跋一倒，抾著二仙錢。
• 一先儉起來好過年，一先買餅送大姨。

貧憚仙

• 一天過了又一天，
• 身軀無洗全全鉎，
• 走去溪仔洗三遍，
• 毒死烏魚數萬千。

一的炒米香

• 一的炒米香，二的炒韭菜
• 三的強強滾，四的炒米粉。
• 五的五將軍，六的六子孫，
• 七的蚵仔飼麵線，八的講伊卜分一半
• 九的九嬸婆，十的撞大鑼。
• 打你千打你萬，打你一千零五萬，羞羞羞袂見笑，
• 猜輸唔甘願，玩輸起蝦龜，唔甘願起蝦龜，
• 我卜來去投老師，投老師。

火車

• 火車卜行東港橋，愈行愈走愈咧叫，
• 一聲短來，一聲長，真賢搖。
• 搖一下來，搖一下去，嗶噗趒。
• 火車卜行西螺橋，愈行愈走愈愛搖，
• 鶯歌若過是板橋，真賢搖。
• 搖一下來，搖一下去，嗶噗趒。

點仔點水缸

• 點仔點仔點水缸，啥乜人仔放屁爛跤尻。
• 點仔點仔點茶甌，啥乜人仔今晚卜來阮兜。
• 點仔點仔點茶壺，啥乜人仔今晚卜娶某。
• 點仔點仔點叮噹，啥乜人仔今晚卜嫁尪。
• 點仔點仔點水缸，啥乜人仔放屁爛跤尻。
• 點仔點仔點書包，啥乜人仔今晚卜來阮兜。
• 點仔點仔點鉛筆，你若是歹囝仔才做白賊也。
• 點仔點仔點紛紛，你是英雄好漢去做軍。

西北雨直直落

• 西北雨直直落，鯽仔魚卜娶某。
• 鮕鮐兄拍鑼鼓，媒人婆仔土虱嫂，
• 日頭暗揣無路，趕緊來火金姑，
• 做好心來照路，西北雨直直落。
• 西北雨直直落，白鷺鷥來趕路。
• 搬山嶺過溪河，找無岫跋一倒，
• 日頭暗卜怎好，土地婆做好心來帶路，
• 西北雨直直落。

秀才騎馬弄弄來

• 秀才秀才騎馬弄弄來，
• 佇馬頂跋落來，跋一下真厲害。
• 喙齒疼，糊下頷。
• 目睭疼，糊目眉。
• 腹肚疼，糊肚臍。
• 嘿真厲害。

龍 眼 乾

• 龍眼乾，三兩半
• 你點燈，阮來看
• 看什麼？看新娘！
• 新娘新咚咚 　　　　
• 舊娘塞壁空

搖仔搖

• 搖仔搖仔搖荖搖
• 搖到內山去挽茄，挽若多？
• 挽到一飯蘺
• 也好食，也好賣，也好互嬰仔做度睟。

掩咯雞

• 掩咯雞，走白蛋，隨你食，
• 哎喲隨你纘，
• 咯雞仔囝，哎喲覓密密。
• 老鼠仔囝偷做賊，一支刀咧一支劍，
• 卜走唔走，唔通哮，唔通哮。

嬰仔睏

• 嬰仔嬰仔睏，一暝大一寸
• 嬰仔嬰仔惜，一暝大一尺
• 搖子日落山，子金金看
• 子是我心肝，驚你受風寒
• 同是一款子，那有兩心情
• 查甫也著痛，查某也著晟
• 痛子像黃金，成人卸責任
• 飼到你嫁娶，我才會放心

羞羞羞

• 羞羞，羞羞羞，提藍仔撿雨鰡。
• 羞羞，羞羞羞，提藍仔撿雨鰡。
• 攏總撿幾尾
• 哎喲，攏總撿兩尾啦，攏總撿兩尾。
• 一尾煮來吃啊嘖嘖，一尾糊目睭啍啍
• 羞羞，羞羞羞。

樹頂一隻猴

• 樹頂一隻猴，樹下一隻狗。
• 猴跋落來，磅著狗。
• 猴亦走，狗亦走。
• 唔知猴驚狗，抑是狗驚猴。

杏仁茶

• 杏仁茶
• 看到警察磕磕爬
• 碗公弄破四五個
• 警察抓來警察衙
• 雙腳跪齊齊
• 大人啊 後擺不敢賣

嫁尪

• 嫁著臭腳尪，捻棉織被塞鼻空
• 嫁著青瞑尪，梳頭抹粉無采工
• 嫁著穩龜尪，棉織被裡會竅空
• 嫁著啞口尪，比腳畫手氣死人
• 嫁著粗皮尪，被單內底炒米香
• 嫁著討海尪，三更暝半喇灶空
• 嫁著矮古尪，燒香點燭叫別人
• 嫁著長腳尪，欲睏著愛斬腳膧
• 嫁著讀書尪，三頓無食也輕鬆

一歲兩歲手裡抱

• 一歲兩歲手裡抱，三歲四歲塗跤脞。
• 五歲六歲漸漸大，有時頭燒佮耳熱。
• 七歲八歲真爻吵，一日顧伊兩支跤。
• 九歲十歲教針黹，驚伊四界去經絲。
• 十一十二著拍罵，此去著那學做衫。
• 十三十四學煮菜，一塊桌面辦會來。
• 十五十六卜轉大，驚伊綴人去風花。
• 十七十八做親情，一半歡喜一半驚。